﷽

Dashnia asht shpirt, po dashnia prej teje asht edhe ma shpirt.

Butësia asht ilaç, po butësia qi vjen prej teje asht edhe ma ilaç.

Mohimi në zylyfet e tua t'mohimit asht ba ma iman se imani.

Me ja besue shpirtin dashnisë asht e lehtë

e me ja besue dashnisë tande edhe ma e lehtë.

Krejt janë mysafirë në sofrën e butësisë tande,

po ky evlad hyzmetçari asht edhe ma mysafir.

Pa ty krejt janë të çrregulluem

po unë jam edhe ma i pagjurmë e ma i çrregulluem.

Dashnia për ty asht nji minierë me pasuni të pashterrshme,

po bashkimi me bukurinë tande asht edhe ma minierë.

Tehu indian i ndamjes asht i mprehtë,

po tehu indian i dashnisë asht edhe ma i mprehtë.

Çdo zemër me ka katër krahë fluturon kah ti —

zemra jeme i ka njiqind krahë e asht edhe ma fluturake.

Për me t’pa ty njiqind shpirta me i këmbye asht lirë,

e me e këmbye shpirtin tem gjysmak asht edhe ma lirë.

Edhe pse kjo rrotë qiellore sillet shpejt

rrota e sferave t’dashnisë sillet edhe ma shpejt.

Krejt janë të friguem prej sferës t'dashnisë

po qajo sferë asht ma e frigueme prej dhimbjes t’zemrës tande.

O Shams i Tabrizit! M’jep hyrmet qi në ty

me u ba njohës ma i madh i mrekullive.