﷽

Thuhet në Kur'anin famëlartë [7:40]

Nuk ka dyshim se ata që përgënjeshtruan argumentet Tona dhe nga mendjemadhësia u larguan prej tyre, atyre nuk u hapen dyert e qiellit dhe nuk do të hyjnë në xhennet deri sa të përbirojë deveja nëpër vrimën e gjilpërës.

Ky ajet na mundëson të kuptojmë se në xhennet nuk hyhet nëse nuk do të mundemi që tërësia e qënies (pra diçka shumë e madhe), do të përmbahet në atë që është shumë e vogël, ashtu siç deveja në vrimën e gjilpërës.

Në të vërtetë Deveja simbolizon Kuranin, dhe ashtu siç libri i Shpalljes Hyjnore përmban në të gjithçka që është krijuar, po ashtu edhe deveja duhet të jetë në gjendje të përfshijë të gjitha kafshët e krijuara, si dhe çdo krijesë tjetër, përfshirë dhe njerëzit.

Kjo metaforë na kujton poezinë e famshme të Ibn Arabiut:

"Zemra ime është bërë e aftë

Për të mirëpritur çdo lloj forme.

Ajo është kullotë për gazelet,

Kishë për murgjit,

Tempull për idhujt.

Ajo është Qabja rreth të cilës sillemi

Ajo është Tevrati,

Dhe fletët e Kuranit.

Unë besoj në fenë e dashurisë

Dhe jam kudo ku shkojnë karvanët e saj,

Sepse dashuria është feja,

Dashuria është besimi im."